Home

11/14/2013

أنـــــــــــــــا كمـــا اراهـــــا

at 11:39 AM
Reactions: 



اوقات كتير بكون عايزة اطلع برة حدود الزمن علشان مش عايزة اقف في نقطه 

اتعد فيها مع باقي البشر عايزة اطلع برة المكان والزمان علشان لما ارجع ملاقيش ان في  وقت عدى اصلا او حاجه فاتتنى..



ناس كتير اوى بيتهمونى بالتقصير وهما ميعرفوش حاجه ومش مهم يعرفه المهم انا عارفه 
ومقدره نفسي وبعاتبها في نفس الوقت انها ازاى سمحت ليهم يزعلوا منها..



انا البنت اللى مينفعش تعمل اى شئ غير بحساب مش قيود مفروضه عليا لكن قيود انا فرضها من الاساس على نفسي

مينفعش اخرج الا لما ارتب كل شئ واشوف ظروف الدنيا وماما ممكن تحتاجنى او تعبانه وهتكون لوحدها

اوقات كتير برفض خروجات حتى من غير رفض ماما علشان بكون حاسه انه مينفعش

انا البنت اللى حساسيتها بتمنعها تروح وتيجى علشان ممكن افكر في غيري اكتر ما افكر في خروجه حلوة

ودة مش وحش بالعكس الحمد الله اوقات بتجيلي حاجات حلوة اعملها وبتكون مميزة فعلا..




انا البنت اللى قبل ما أشتغل لو مصروفي خلص مبقاش عارفه اطلب فلوس تانى مش قله 

فلوس انما كسوف من الطلب نفسه وهطلب ازاى وببقي مقدره حتى لو الحياه بيس..





  حياتى حاليا محورها الشغل اللى بتمرمط علشان اروحه وتلت تربع وقتى ضايع فيه

 و مش حاسه بجنان علشان طموحى محملنى اكمل لحد ما الاقي الافضل ان شاء الله..




حيـــاتى اوقات كتير مبتكونش مثاليه ولا حلوة زى افيشات الافلام بس بحاول اخرج بره اطار الضحيه المظلومه
صحيح اوقات بقع في ازمه الاكتئاب واللى بيخلينى اقصر وناس تزعل منى
بس انا مش جابره حد يعرفنى علشان انا بسئل او هو اللى بيسئل
انا بحب البشر بغض النظرهما فين وعملوا ايه معايا او معملوش لان الحب عندى حب مش مربوط بشئ معين
ومش مضطرة اعرف كل البشر ظروف حياتى علشان يقدروا الطبيعى ان اوقات كتير احنا بنعجز اننا نقول اللى جوانا او نقول اننا مش بخير 
وانا بالذات بعجز في الموضوع دة بزياده اوى..



التقدير البشري مش مربوط بان حد يقولك ظروفه فتقدره  دة مربوط بيك انت 

انك عندك تقدير واحتمالات لتقصير اللي قدامك انه مش هيعمل كده من فراغ 

لانك اكيد عديت بوقت مكنتش قادر تكلم في حد ولا تقول اللى جواك كان وجعك اكبر 
من انك تستحمل تسمعه لحد غيرك وتحس بشفقه في عيون اللي قدامك

كان اسهلك تاخده وتستحمله لوحدك وتعيش بيه ولتدفنه مع الوقت وتفضل بقايا بتروح
وتيجى زى التراب كده ، ليدفنك هو معاه

انت بتقدر علشان يجى اليوم اللى تتقدر فيه ...

الناس مش المفترض  يستنوا مننا حاجه ولا احنا كمان المفترض احترامنا لبعض بيخلي دايما في مساحه انى ممكن اتصرف بالشكل اللي يريحنى مش هتكون انانيه لو اتعاملنا كده لأن وقتها انت واللى قدامك هتلاقوا نفسكم بتعملوا اللى مستنينه من بعض بس بمزاجكم انتم مش باسلوب لازم
واة مش حلو اننا طول الوقت نقول لحد احنا عايزين ايه اوقات لما بيعمل الشئ من نفسه بيريحنا وبيحسسنا بحبه
واهتمامه لانه فهمنا
بس كمان مش لازم ننسي اننا اوقات مبنكنش مفهومين احنا عايزين ايه بالظيبط ودة بيخلى اللي قدامك في حيرة وتخبط
عايز يجبلك الدنيا بس مش عارفه هتبسطك فعلا ولا لأ  

5 مختبئينـــــــــي:

Bent Men ElZman Da !! on 12/11/2013 08:01:00 PM said...

أفهم يعني! إزاي أنا أوصل للمدونة دي بالصدفة كدة؟
بتهرجي علي فكرة بقي

كلاكيت تاني مرة
أفهم بقي! إزاي إنتِ وصفه نفسك كدة وكأنك بتوصفي حالات كتير اوي أوي بمر بيها
أعتبر ده تخاطر أرواح والا أيه؟

وحشني الشبه اللي بينا ده :)

rona ali on 9/06/2014 11:07:00 AM said...

دينا رب صدفه خير من الف ميعاد

مدونه عملتها ليا لبني وقت الحوليات
ومقدرتش اتابع ولا انشرها ولا انشر حاجه فيها

انا كماني وحشني حاجات كتير بينا :))

Uouo Uo on 4/15/2015 02:47:00 PM said...


thx

كشف تسربات المياة
غسيل خزانات
شركة نظافة عامة

Emtiaz Zourob on 4/22/2015 01:11:00 PM said...

كلنا نمر بحالات مشابهة لحالتك

هذه هي الحياة بكل تقلباتها وعلينا تقبلها كما هي

كوني بخير دائمًا

Uouo Uo on 8/16/2015 12:54:00 PM said...


thank you

سعودي اوتو

Post a Comment

استخبوا لحد يشوفكم :)

 

حوليـات مختــــبئه Copyright © 2011 Design by Ipietoon Blogger Template | web hosting